سعيد الشاوي – كود كازا ///
هاجم محمد بودريقة عضو المكتب السياسي لحزب التجمع الوطني للاحرار رسالة بعثها حزب التقدم والاشتراكية لرئيس الحكومة عزيز اخنوش.
بودريقة اعتبر فتصريح ل”كود” ان ما اقدم عليه نبيل بنعبد الله امين عام التقدم والاشتراكية غباء واهانة لمغرب المؤسسات٬ مشيرات فتصريح ل”كود” ان الحكومة الحالية هي حكومة ائتلاف بين 3 احزاب “باينة ان بنعبد الله كيحن للمرحلة الشيوعية اللي فيها حزب واحد. باغي يرجع بينا للمرحلة الحزب الوحيد. راه المغرب قطع مع هاد العهد. راه سالينا من الحزب الشيوعي المغربي وما عمرنا فرطنا فالتعددية فبلادنا”
واكد بودريقة ل”كود” ان هاد الحزب فشل يدير المعارضة كيف هو متعارف عليها وبدا ينقز ويساءل رئيس الحكومة خارج الاعراف الديموقراطية وخارج المؤسسات اللي عطاها الدستور للمعارضة.
بودريقة ذكر فتصريحو ل”كود” بنعبد الله باعفاؤو من الحكومة ف2017 بعد فشلو فالمهام ديالو في اشارة الى اعفاء الملك ف2017 لعدد من الوزراء على خلفية ملف “الحسيمة منارة المتوسط”. كان ديك الساعة وزير السكنى وسياسة المدينة وكان طاح معاه كل من محمد حصاد والحسين الوردي والعربي بن الشيخ بالاضافة الى مدير المكتب الوطني للكهرباء والماء الفاسي الفهري
وقال بودريقة ل”كود” ان كل هادوك اللي تعفاو احتارمو ريوسهم ونساحبو من الحياة السياسية الا بنعبد الله اللي مصر يبقى ابدا على رأس الحزب وقضى على الاصوات المعارضة واليوم باغي يعطي الدروس لحزبنا
وذكر بورديقة فتصريحو ل”كود” بانجازات الحكومة وقال باللي انجازاتها كتعتارف بيها مؤسسات دولية واشار الى تقرير الوكالة الدولية للتنقيط الائتماني ستاندار اند بورز” البارح وفيه اشادة “الاصلاحات الهيكلية بالمغرب اللي كتفتح الطريق تدريجيا لاقتصاد اندماجي وان هاد الوكالة على تنقيط المغرب =بي بي زائد= اي دارتنا فخانة “مستقرة” واعتبرات الاصلاحات ديال الحكومة “كتفتح الطريق تدريجيا لاقتصاد اندماجي”
ونصح بودريقة، عبر “كود” بنعبد الله باش، عوض السياسة العنترية الخاوية، يعتارف بالعمل لكبير لهاد الحكومة
